2019 წლის 22 აპრილს გორის სახელმწიფო სასწავლო უნივერსიტეტს, ჰუმანიტარულ მეცნიერებათა ფაკულტეტის მოწვევით, საგანმანათლებლო პროგრამების აკრედიტაცია-ავტორიზაციის მზადების პროცესში, კურსდამთავრებულთა დამსაქმებლების რანგში ეწვივნენ და სამუშაო შეხვედრა გამართეს საქართველოს ეროვნული ბიბლიოთეკის გენერალური დირექტორის მოადგილე ბატონი მირიან ხოსიტაშვილი, ეროვნული მუზეუმის გენერალური დირექტორის მოადგილე, ბატონი მიხეილ წერეთელი და გორის სახელმწიფო არქივის დირექტორი, ქალბატონი იზოლდა ბუჟღულაშვილი.
შეხვედრაში მონაწილეობდნენ ისტორიის და ქართული ფილოლოგიის საბაკალავრო და სამაგისტრო საგანმანათლებლო პროგრამების ხელმძღვანელები, ფაკულტეტის დეკანი, ხარისხის უზრუნველყოფის სამსახურის თანამშრომლები და პროგრამებში ჩართული აკადემიური პერსონალი.
სტუმრებმა ყურადღება გაამახვილეს კურსდამთავრებულთათვის საჭირო პროფესიული ცოდნის, უნარებისა და ღირებულებების თაობაზე, ისაუბრეს შიდა ქართლში დაგეგმილ და უკვე განხორციელებულ აქტივობებთან დაკავშირებით და გამოთქვეს გორის სახელმწიფო სასწავლო უნივერსიტეტთან შემდგომი თანამშრომლობის სურვილი, მათ შორის კურსდამთავრებულთა დასაქმების თვალსაზრისით.