მიმდინარე წლის 1 ივნისს გორის სახელმწიფო სასწავლო უნივერსიტეტს ეწვივნენ საქართველოს განათლებისა და მეცნიერების სამინისტროს წარმომადგენლები: საქართველოს განათლებისა და მეცნიერების სამინისტროს მეცნიერების პოპულარიზაციის პროგრამის კოორდინატორი, ქალბატონი თათია მთვარელიძე და უმაღლესი განათლების და მეცნიერების დეპარტამენტის მოადგილის მოვალეობის შემსრულებელი, ბატონი ზაზა მარუაშვილი. შეხვედრის მთავარი მიზანი იყო გორის უნივერსიტეტში Horizon Europe-ის საგრანტო ოფისის განთავსების საკითხის განხილვა.
2021 წლიდან საქართველოს 9 უმაღლეს სასწავლებელში ამოქმედდება ევროპული სივრცეები, რომლებშიც Horizon Europe-ის საგრანტო ოფისები განთავსდება. ეს სივცეები 2020 წელს უკვე მოეწყო 8 უნივერსიტეტში, 2021 წელს კი პროექტს შეუერთდება გორის უნივერსიტეტი, რაც რეგიონის სამეცნიერო საზოგადოებას ევროპულ სამეცნიერო სივრცესთან კიდევ უფრო დაახლოებს.
ევროპული სივრცის კედელზე შესრულდება სამეცნიერო თემატიკის კედლის მხატვრობა, რომელსაც სამხატვრო აკადემიის სტუდენტები შეასრულებენ. მოხატვის პროცესში ჩატარდება მასტერკლასი გორის სამხატვრო სკოლის მოსწავლეებისთვისაც.